Qreact şirkətinin həmtəsisçisi Anar Məmmədovla müsahibəmizi Sizə təqdim edirik. Qreact real vaxt rejiminde müştəri rəylərinin dəyərləndirilməsi və keyfiyyətə nəzarət mexanizmidir.


Qreact ideyası necə yarandı?

Əslində Qreact ideya olaraq çoxdan var idi. İdeya hər gün qarşılaşdığımız problemlər nəticəsində yarandı. Özəlliklə ictimai nəqliyyatda qarşılaşdığımız problemlərdən. Çünki, ictimati nəqliyyatda hər hansı problem baş verdikdə qaynar xəttlə əlaqə saxlamaq, geri dönüşü gözləmək insanların vaxtını alır. Belə olduğu halda nəqliyyatlarda QR kodları yerləşdirmək qərarına gəldik və kimin problemi varsa sürətli şəkildə o problemi və ya təklifini paylaşa bilsin və bu problem aiddiyatı orqan tərəfindən nəzərə alınsın.

Digər tərəfdən biz 2018-ci ildə getdiyimiz ən müasir restoranlarda, otellərdə şikayət qutuları gördükdə başa düşdük ki, artıq müasir innovativ həllərdən istifadə etməyin vaxtıdır. Həm də kağız üsulu ilə edilən sorğuların, anketlərin konkret bir analitikası yoxdur. Beləcə başladıq Azərbaycanın ən böyük şirkətləriylə görüşlərə. Qısa zaman ərzində xarici ölkələrlə də əməkdaşlıq etməyə başladıq və komandanı böyütdük. Həm texniki, həm də satış heyətimiz böyüdü. Hazırda 30-dan çox ölkədə yarım milyondan çox insan Qreact-dan istifadə edir. Biz düşünürük ki, bu göstərici gələn il ən azı 1 milyona çatacaq və təbii ki, gəlirlərimiz də artacaq. Azərbaycanda biz Paşa Sığorta, Azercell, 189 Taxi, Hilton Hotel, Mariott Hotell kimi böyük şirkət və hotellərlə işləyirik.

Azərbaycanda rəqibiniz varmı?

Ümumiyyətlə kağız anketlər və sorğular da bizim rəqibimizidir. Ancaq Azərbaycanda bizim kimi müasir üsulla problemi innovativ şəkildə həll edən bir şirkət yoxdur. Dünyada isə dediyim kimi alternativlər çoxdur. Bizim əsas fərqimiz az sualla müştəriyə daha çox məlumat qazandırmaqdır. Bunun sirri isə QR kodlardadır.

Müştəriləri necə qazanırsınız, məhsulu necə satırsınız?

Azərbaycanda biz indiyə kimi bir başa satışlar həyata keçirmişik. Azərbaycanda bu məhsulu satmaq həm çətindir, həm asan. Asandır ona görə ki, rəqibimiz yoxdur. Çətin tərəfi ondadır ki, belə bir alətdən heç bir zaman istifadə edilməyib deyə maarifləndirməyə çox vaxt gedir. Xarici müştəriləmirizə satışı 2 həftə ərzində həyata keçirdiyimiz halda bizdə bu proses bəzən 3-4 ay çəkir.

Qlobalda ciddi rəqibləriniz kimlərdir?

Qlobalda ciddi və böyük rəqiblərimiz çoxdur. Əsas rəqiblərimizdən biri Getfeedbackdir. Hansı ki, Surveymonkey tərəfədindən satın alıdı. Surveymonkey bizim kimi bir startap olub, indi isə milyard dollarlıq bir şirkətdir. Digər rəqiblərimizdən biri isə bu yaxınlarda 8 milyard dollara satın alınıb.

Startap qurmazdan öncə nə işlə məşğul idiniz?

Mən 10 il hotelçilik sahəsində çalışmışam. Kariyeramın əksər hissəsini satış sahəsində, ondan əvvəl isə əməliyyat departamentində qonaqlarla bir-başa ünsiyyətdə keçirmişəm. Ona görə də xidmət sahəsində olar çatışmazlıqları və problemləri yaxşı bilirik, onu necə həll etməli olduğumuzu da.

10 illik kariyeradan startap ekosisteminə keçid prosesi necə baş verdi? Çünki, biz bilirik ki, bəzən bu çox riskli bir hərəkət olur.

Mən və digər həmtəsisçimiz Elşən Mirzəyev xidmət sahəsində çalışmışıq. Digər həmtəsçimiz olan Ziya Əsgərov isə artıq 20 ilə yaxındır ki, İT sahəsindədir. Biz bu məhsulu hazır edəndə hələ də əvvəlki işimizdə çalışırdıq. Məhsulu hazır edəndən və şirkətlərlə görüşəndən və pozitiv cavablar aldıqdan sonra başa düşdük ki, bu işin üstünə ciddi düşmək lazımdır və mən qərara gəldim ki, artıq startap ekosisteminə atılmağın vaxtıdır. Beləcə işdən ayrılıb yaratdığımız startapın üzərində işləməyə başladım.

Ənənəvi iş rejimində iş saatları standart olur. Səhər 9-dan axşam 6-ya kimi. Sizdə necədir? Daha az işləyirsiniz yoxsa əksinə?

Proqramı tamamilə hazır edənə qədər biz sözün əsl mənasında gecələr yatmırdıq. İndi də bəzən bu hallar baş verir. Ümumiyyətlə iş günü, iş saatı startapın lüğətində yoxdur.

Az əvvəl rəqiblərdən danışdıq. Maraqlıdır Azərbaycan bazarına böyük bir rəqibiniz daxil olsa nə baş verər?

Azərbaycan bazarı olduqca kiçik bazardır. Mənim fikrimcə ciddi və böyük rəqiblərimizin Azərbaycan bazarına daxil olmaq planı yoxdur.

Çox vaxt böyük şirkətlər digər bir ölkənin bazarına daxil olduqda satınalma prosesi baş verir. Yəni həmin ölkədəki kiçik rəqibini satın alır. Bəs sizin planınızda startapı exit etmək varmı?

Əlbəttə hər bir startapın bir exit planı var. Bizim məqsədimiz də son nəticədə uğurlu şəkildə exit etməkdir.

Hədəfiniz hansı məbləğdir?

Hədəfimiz minimum 100 milyon dollardır. Ancaq hər bir şey startap ekosistemindəki hadisələrin gedişatından aslıdır. Ola bilər ki, düzgün zamanda yarım milyard dollara da exit edə bilərik.

Qreact sizin ilk startapınızdır?

Həmtəsisçi olaraq şəxsən mənim ilk startapımdır. Bundan öncə ənənəvi bizneslə məşğul olmuşam. Hazırda həmin bizneslərim davam edir, sadəcə olaraq idarəçiliyini mən etmirəm.

Yeni bir startap ideyası varmı?

Əgər Qreactla məşğuluqsa və bu startapın gələcəyinə ciddi şəkildə inanırıqsa bütün fikrimizi bu işə fokuslamalıyıq. Təbii ki, tez-tez başqa ideyalar da yaranır. Ancaq hələ ki, bütün planımız Qreact üzərindədir.

Hədəfləriniz nələrdir?

Hədəflərimiz çoxdur. Ən əsası Qreactı həndəsi silsilə şəkildə böyütməkdir.


Müsahibəyə görə təşəkkür edirik!

Rəy yaz

Rəyinizi yazın
Adınızı daxil edin